എവിടെയോ കൊത്തിവലിയ്ക്കുന്നിതെന് മന-
മൊരുപാടു സഞ്ചരിച്ചിന്നീ നിമിഷത്തില്
അറിയുവാനൊട്ടു ത്വരയുണ്ടു, ചൊല്ലുവാ-
നൊരുപാടു കൊച്ചു നിമിഷമെന്നോര്മ്മയില്
ഒരു കൊച്ചു കാറ്റുവന്നോതുമീ വാര്ത്തയി-
ന്നൊരുതരിപോലുമെനിയ്ക്കില്ല വിശ്വാസ-
മറിയുവോര്ക്കൊന്നുമുണ്ടാകില്ല, നിന്റെയാ-
ചിരിവിടരും മുഖം ദര്പ്പണം മന്മനം
കരയുവാനൊട്ടു ശ്രമിച്ചു, വൃഥാവിലായ്
കടലെന് മനസ്സിലാണല്ലൊ, സഹോദരാ
ഇതുവരെക്കേട്ടതെല്ലാം നുണയാണെന്നു
കരുതുവാനാകില്, നിന് പ്രിയതമ തന് മുഖ-
മൊരുനോക്കു കാണാനശക്ത ഞാന്, സാന്ത്വന-
മരുളാനതാക, വിതുമ്പുന്നു ഞാന് നിന്റെ
ഹൃദയത്തുടിപ്പാകുമോമനക്കുഞ്ഞുങ്ങ-
ളെവിടെത്തിരയുമാ സ്നേഹവും രക്ഷയും,
കഴിയട്ടെയെല്ലാം മറക്കാന്, ദിനരാത്ര-
മൊഴുകുമ്പൊളെന്നാലവിടെയിരുട്ടിലാ
തലയും കുനിച്ചിരു കണ്ണുമടച്ചിട്ടു
ഭഗവല്ത്തിരുനാമമോതിടും നിന്നുടെ
പ്രിയജനനിയിതു താങ്ങുവതെങ്ങനെ?
ഇനിയും പരീക്ഷകളെന്തിനായിത്തരം?
